Zabardast yigit Rossiyaga ishga otlanib turibdi. Avvalgi kelishida ko'p yillik niyatlaridan biri ushalib, «Jentra» olgan ekan. 3-4-oy havas ila mingan, endi bilsa, mashina qorin to'ydirmaydi, qolaversa, xarajati ham ko'p. Endi shuni sotib, yana Rossiyani ko'zlamoqda. Hovlida chang bosib yotganidan ne foyda? Yangi markalari chiqayapti, bu tezda eskiradi. O'zi qachon qaytishi ham aniq emas. Qolaversa, oilasiga nafaqa qoldirishi kerak, mashinani tomosha qilib o'tirishadimi? Yana qiziq tomoni, yarim yil avval suyuna-suyuna sotib olgan narxidan 1-2 ming do'llar arzon bahogayam xaridor chiqmayapti…

Tushlik bahona Rusiyada ishlab yurganlar haqida ayrim taassufli gaplarni aytdi. «Rossiyada o'zbeklar boshqa millatlardan emas, bir-biridan eng ko'p qo'rqadi. Boshqa millatlar ahil, albatta bir-birini qo'llaydi, faqat o'zbeklar unday emas. O'zbeklar eng ko'p sonli, agar o'zaro biriksa, bir-birini qo'llasa, bizga hech kimni kuchi yetmaydi. Lekin o'zaro ishonch yo'q, qadr yo'q.

Rossiyada xor bo'lib yurgan o'zbeklarning son-sanog'i yo'q, hech kim ularni so'ramaydi. Bir-birini aldash, sotish, chuv tushirish, pulini tortib olishda bizga yetadigani yo'q»… Xullas, yigit bunday savdolarni ko'p ko'rgani sezilib turibdi, lekin uni eshitish ham oson emas! Masalan, es-hushli, baquvvat 32 yoshlardagi shu yigit – qachongacha Rossiyaga qatnaydi, oila, farzandlar tarbiyasi nima bo'layapti?

«Falonchi og'aynim Rossiyada ishlab, «evro-uy» qurdi, lekin qishloq adog'idagi uyiga borish uchun traktor kerak, yo'l yo'q…» deydi. O'zi-chi? Pul topibdi xo'p, lekin shu mashina juda zarilmidi? Keyingi kelishida tomorqasini devor bilan o'raydi, o'g'lini sunnat qiladi. Yana ketadi… Shu tariqa yillar o'tadi, asta-sekin yoki to'satdan kuch-quvvat ham ketadi.

Axir, u yoqda kundalik rejim, yaxshi ovqat, o'zini parvarish qilish qayda! Ungacha, o'rniga o'g'li «Rossiyabop» bo'lib yetishib qoladi.

Aytgancha, uning o'zi ikkinchi yo uchinchi avlod «gastarbayter» bo'lsa kerak.

Vatanda esa… qayta-qayta yangi schyotchiklar o'rnatish, oxiri ko'rinmaydigan qarzdorlik, millat, davlat, iymon-insof degan tushunchalarga tupurgan monopoliyalar, qarsakboz deputatlar va lo'ttiboz amaldorlar, davlat idoralarida milliard-milliard o'g'irliklar, arosatda qolgan iqtisod, ta'lim, tibbiyot tizimi…