Ortog‘i haqida so‘zlab berdi
Zarina Nizomiddinova mish-mishlarga izoh bermasligi va o‘zidan 12 yosh katta turmush o‘rtog‘i haqida so‘zlab berdi
Ayni paytda Rossiyaning Moskva shahrida yashayotgan, yaqinda ikkinchi bor onalik baxtiga sazovor bo‘lgan Zarina Nizomiddinova Instagram orqali muxlislarini qiziqtirgan ko‘plab savollarga javob berdi. Zarinaga berilgan savollarning aksariyati turmush o‘rtog‘i hamda ikkinchi o‘g‘li haqida bo‘ldi. Quyida aktrisa va uning folloverlari o‘rtasidagi savol-javoblarni e’tiboringizga havola etamiz.

— Saidumarning ismini kim qo‘ygan?
— Hammamiz, butun oilamiz bilan.

— Saidumar injiqmi?
— U juda mehribon, yaxshi bola. Yaqinda uning yuzini ko‘rsatganimda hamma uning aslida qanchalik shirin, mehribon va iste’dodli bola ekanini tushunadi.

— Saidumarning dadasining ismi?
— Uning dadasining ismi odatiy o‘zbekcha ism, lekin aniq odamlar hozir taxmin qilayotgan ismlar emas. Siz meni tushundingiz.

— To‘yingizdagi rasmingizni qo‘ying, iltimos, agar mumkin bo‘lsa.
— Qanaqa to‘y? Kulgili bo‘lar endi kap-katta o‘g‘lim bilan to‘y qilsak. Biz oilaviy to‘y qilmaslik qarorini qabul qildik. Eng asosiysi Allohning oldidagi burchimiz.

— Homiladorlikda qancha ortiqcha vazn to‘pladingiz?
— Kuchli toksikoz tufayli ko‘p vazn to‘plamadim. Bor-yo‘g‘i 10 kilo.

— Farzandingiz necha kilo vazn bilan, qayerda tug‘ildi?
— Men haqiqiy polvonni 4 kilo vazn bilan dunyoga keltirdim. U Moskva shahrida tug‘ildi, shuning uchun u Rossiya fuqarosi.

— Sunnat qildirdizmi o‘g‘lingizni?
— 7 kunlik chaqaloqligida qildirdik.

— Moskva yaxshimi yoki Toshkent?
— Moskvada ham yaxshi, biroq men Vatanimni sevaman. Tez orada albatta qaytaman, inshoolloh.

— Katta o‘g‘lingizga o‘xshaydimi Saidumar?
— O‘xshashmaydi, lekin sho‘xligi akasiga o‘xshaydi.

— Homiladorlik paytingizda gripp bo‘ldingizmi?
— Men homiladorlik paytimda kasal bo‘lishga juda qo‘rqdim, shuning uchun sog‘lig‘imga e’tiborli bo‘ldim. Men nafaqat o‘z salomatligim, balki ichimdagi kichkina odamning ham salomatligi uchun mas’uliyatni his etdim. Shu sababli homiladorlik paytida biror marta kasal bo‘lmadim, alhamdulillah.

— Katta o‘g‘lingizni ham kichkinangizdek yaxshi ko‘rasizmi?
— O‘ylashimcha, har bir ona farzandlarini birdek yaxshi ko‘radi. Shunchaki, kichkinalarni biz ko‘proq erkalatamiz. Chunki ular bizning mehrimizga kattalardan ko‘ra ko‘proq ehtiyoj sezadi. Biroq ularning ikkalasini ham birdek yaxshi ko‘raman.

— Saidumar sizning nikohli farzandingizmi?
— Ha, albatta, nikohli. Musulmonmiz axir.

— Turmush o‘rtog‘ingiz qayerlik?
— Kelib chiqishi O‘zbekistondan, toshkentlik.

— Uning yoshi nechada?
— Turmush o‘rtog‘im 43 yoshda, u musulmon. Men 31 yoshdaman.

— Agar o‘g‘lingizning otasi haqiqatan ham odamlar aytayotgan inson bo‘lmasa, nima uchun mish-mishlarga barham bermaysiz?
— Men omma e’tiboridagi shaxsman. Men haqimda turli gap-so‘zlar, mish-mishlar bo‘lishi tabiiy. Bunga ko‘nikib qolganman. Ba’zan izohlarni o‘qib, kulgim keladi. Hozir kimgadir nimanidir isbotlaydigan vaqt emas. Meni yaxshi biladigan va adekvat insonlar shundoq ham menga ishonadi. Umuman olganda, men hamma narsani vaqt hukmiga tashlayman. Vaqt hammasini o‘z joyiga qo‘yadi.

— Qachon O‘zbekistonga qaytasiz?
— Men O‘zbekistonga faqat virus tufayli, yosh bolali bo‘lganim va uning uchun qayg‘urayotganim uchungina qayta olmayapman. Odamlar o‘ylab topayotgan boshqa sabablar tufayli emas.

— Turmush o‘rtog‘ingiz bilan ham surat qo‘yasizmi?
— Bunaqa narsalarga qiziqmayman. Balki qo‘yarman, balki yo‘q.

— Moskvada hovlida turasizmi yoki ko‘p qavatli uydami?
— Hovlida qaynota va qaynonam turishadi. Biz esa ko‘p qavatli uyda.

— Turmush o‘rtog‘ingiz qanaqa inson?
— Juda samimiy, oqko‘ngil, birovga yomonligi yo‘q, eng asosiysi ota-onasiga juda g‘amxo‘r inson.

— U qayerda tahsil olgan?
— Turmush o‘rtog‘imning ma’lumoti oliy. Londonda universitetni tamomlagan.

— Kinoda tanaffus qilyapsizmi yoki ketdingizmi?
— Buni kichik tanaffus deb hisoblaymiz.

— Nima sababdan O‘zbekistondan chiqib ketdingiz yoki kimdir sababchi bo‘ldimi?
— Endi nima desam ekan, shunchaki Saidumarning otasi Moskvada yashaydi. Shunga farzand otasining oldida bo‘lishi kerak, deb o‘yladim.

— Nima uchun homiladorlik davringizdagi rasmlar bilan bo‘lishmadingiz?
— Bilmasam, shunga qaror qildim. Balki, keyinchalik fikrimni o‘zgartirsam, bo‘lisharman. Lekin u rasmlar qiziqmas, deb o‘ylayman. Hamma qatori dumaloq qorinli rasmlar.

— O‘g‘illaringiz orasida necha yosh farq bor?
— Farzandlarimning orasi 12 yosh

— O‘g‘il kutdingizmi yoki qiz?
— Faqat o‘g‘il xohladim, shunaqa asal o‘g‘il.

— O‘g‘lingizning sochlari sariq, otasi sariqmi?
— Onasining ham sochlari tillarang bo‘lgan chaqaloqligida.

— Maslahatingiz kerak: Malibu 2 olaymi yoki Hyundai Sonata?
— Qaysi biri yangi bo‘lsa, o‘shani oling. Ammo Malibu 2 olsangiz, kelajakda sotishga qiynalmaysiz, shunisi bor.